Hinder em neue Markt Kafi stöhnd mir, ä Gruppe vo junge Fraue, wo sit fast 25 Johr mitenand befründet sind. So lang scho gönd mir zämä dur dick und dünn & wüssed, dass mer üs uf enand verloh chönd. Als Chletterpartnerinne i dä Halle und am Fels vertraued mir enand sogar üses Lebe a.

S Betriebe vom neue Markt Kafi isch ä gmeinsams Herzens-Projekt, denn üsi teilte Liideschafte chömed dodebii voll und ganz zum Träge. Mir freued üs uf s Irichte, s liebevolle Dekoriere, s Bache, s Bewirte und di viele schöne Begegnige mit liebe Mensche wie dir. Es isch üse Wunsch dä Bischofszeller Wuchemarkt mit eme schöne, gmüetliche Markt Kafi z beriichere.