Marktkafi

Wichtigi Mitteilig:

Schweren Herzens müend mir dir mitteile, dass üses Markt Kafi noch dere Saison für immer sini Türe schlüsst. Ufgrund vo mim Wegzug us Bischofszell (Giovanna) isch d' Planig und Durefüehrig vo dä Markt Kafi Täg um ä Vielfachs komplizierter worde. Zudem wird d' Kornhalle meh und meh privat buecht, was für üs dä Arbetsufwand enorm erhöht. S' Ufstelle und Abbaue vo üsere ganze Infrastruktur nimmt sehr viel Ziit in Aspruch und do ez niemer meh vo üs in Bischofszell wohnt, isch das au nüm so "schnell gemacht". Würed mir s' Markt Kafi hauptbrueflich füehre, wär da ganz en anderi Gschicht. 

Dass immer meh Gäst dä Weg zu üs is Kafi gfunde hend und ez zu üsne liebe Stammgäst zähled, freut üs extrem. Es spricht für ÜS, für DAS, wo mir mached und v.a. däfür WIE mir s' mached - mit viel Liebi, Hiigoob und Freud. Aber auch s' Däzuegwünne vo Gäst het leider sini Schattesiite - di grosse Markt Täg sind für üs z' zweite kum z' bewältige und es wird immer schwieriger Helfer ufzbüüte, wo en Teil vo ihrem Wuchenend für s' Markt Kafi ufopfered.

Für üs isch immer scho klar gsi:

Bevor üses Markt Kafi a Qualität verlüürt und üs d' Freud abhande chunnt, lönd mir üses Herzensprojekt lieber los - au wenn s' üs natürli schwer fallt. 

 

Für d' Stadt Bischofszell würed mir üs Markt Kafi-Nochfolger wünsche. Mir hend au diversi Persone agfrogt - leider erfolglos. 

Falls DU also Ziit und Lust hettsch, ä tolls Projekt mit guetem, fixfertigem Konzept z' überneh, denn MELD DI bitte bi üs. Mir würed üs sehr freue. 

 

Bis uf bald im Markt Kafi!

Sabrina und Giovanna